మేం తిరగబడితే మీకు పుట్టగతులండవు బాబూ..

న్యూస్ ఫ్లాష్

1000 పరుగులు చేసిన ప్రణవ్ ధనవాడేకు సచిన్ టెండూల్కర్ అభినందనలు

Share on:

మీరు ఇక్కడ ఉన్నారు: హోం జిల్లాలుకథ

మేం తిరగబడితే మీకు పుట్టగతులండవు బాబూ..

Sakshi | Updated: January 05, 2016 15:55 (IST)

కిర్లంపూడి : ఆంధ్రప్రదేశ్ ముఖ్యమంత్రి చంద్రబాబు నాయుడుకు మాజీ మంత్రి, కాపు నాయకుడు ముద్రగడ పద్మనాభం మరోసారి ఘాటుగా లేఖాస్త్రం సంధించారు. ఎన్ని అడ్డంకులు సృష్టించినా కాపు బహిరంగ సభ నిర్వహిస్తామని, తాము తిరగబడితే మీకు పుట్టగతులుండవని ఆయన తీవ్రస్థాయిలో ధ్వజమెత్తారు. ఓ దినపత్రికలో తనపై వ్యతిరేకంగా వార్తలు రాయిస్తున్నారని,  చంద్రబాబుకు దమ్ముంటే తన పేరుతోనే వార్తలు రాయించవచ్చని ముద్రగడ సవాల్ విసిరారు.
ముద్రగడ తన లేఖలో ఏమన్నారంటే... తమరి పరిపాలనలో కుల సమావేశం మాజాతి తప్ప ఎవరైనా పెట్టుకోవచ్చా? మీ సొంత సామాజిక వర్గం తరచూ పెట్టుకున్నా అభ్యంతరంలేదా? మా జాతి తాలిబన్ టెర్రరిస్టుల్లాంటి వారా? లేక ఏ దేశం నుంచైనా తన్ని తరిమేస్తే ఈ దేశానికి వచ్చినవారమా? ఈ కరివేపాకు జాతి అంతరించి పోవాలని మీజాతిలో కొందరి పెద్దల ఆరాటమా? భారత రాజ్యాంగంలో ఈ జాతి వారు సభలు పెట్టుకోకూడదని ఆంక్షలేమైనా ఉన్నాయా? మీ జాతి వారు మీ సహకారంతో విదేశాలలో కులసభలు పెట్టుకోవడం లేదా?.

 ఎన్నికల సమయంలో బీసీ రిజర్వేషన్లు, ఏటా రూ.1000 కోట్లు ఇచ్చి ఆదుకుంటానని హామీ ఇవ్వడం వల్లే మీరు గద్దెనెక్కారు. కోరిక తీరిన తర్వాత వామనమూర్తి బలిచక్రవర్తిని అభినందిస్తూ పాతాళానికి తొక్కినట్లుగా కాపు జాతి ఓట్లతో నెగ్గి, వారిని మీ పాదాలతోనే అధ:పాతానికి తొక్కివేయాలనే ఆలోచన మహాపాపం. వంగవీటి రంగాని చంపినప్పుడు ఈ జాతిపై తడా చట్టం ప్రయోగించినప్పుడు కూడా కాకినాడలో పెద్ద బహిరంగ సభ పెట్టుకున్నామే, ఎన్నో ప్రభుత్వాలకు వ్యతిరేకంగా ఎన్నో సభలు జరుపుకున్న సందర్భాలలో లేని ఆంక్షలు 2016 జనవరి ఆఖరి వరకు పెట్టడంలో గల ఆంతర్యం ఈ కాపు జాతిని యుద్ధానికి ముందే ఆహ్వానించడమా? కయ్యానికి కాలు దువ్వడమా?

రాజ్యాంగం, చట్టాలు మీ కులం లేక మీ కుటుంబం కోసం తయారు చేసినవు కావు. ప్రజల కోసం ఎప్పటికప్పుడు చట్టాలు మార్పు చేసుకోవచ్చు. అలాంటిది మాకులం సమస్య వచ్చినప్పుడు వంకరగా మాట్లాడటం ఆపండి. ఈ ఉద్యమంలో మా సోదర సోదరీమణులపై లాఠీలు ఎత్తితే తగిన మూల్యం చెల్లించక తప్పదు. 1910 నుంచి 1956 వరకు, 1961 నుంచి 1966 వరకు మా కాపు జాతి అనుభవించిన బీసీ రిజర్వేషన్లు వెంటనే పునరుద్ధరించాలి. రాజ్యాంగ బద్దంగా ఇచ్చిన జీఓ నెం.30/94 అమలు చేయాలి. లేదా కాపు జాతిని బీసీల్లో చేర్చి రిజర్వేషన్లు కల్పించమని మరో కొత్త జీఓ అయినా ఇచ్చి అసెంబ్లీలో తీర్మానం చేసి 9వ షెడ్యూల్లో చేర్చమని కేంద్రానికి పంపండి తప్ప కమిషన్లు వేసి ఈ జాతిని మోసం చేయకండి' అని లేఖలో పేర్కొన్నారు.